देशको हालत झन् झन् बिग्रिदै थियो !आर्मी र बिद्रोही जान मुक्ती सेना बीच झडप भैरहन्थ्यो !जिल्ला सदरमुकाम हरुमा बिद्रोही सेनाले कुन दिन आक्रमण गर्ने हो कसैलाई थाहा हुदैन थियो !बाटोमा बम र पाशोमा परेर पनि कति मानिस मरे !मानव अधिकार र युद्धका न्युनतम सिद्धान्तको पालना दुवै तर्फबाट भएन !सर्बसाधारण चढेको बसमा कहिले मान्छे उतारेर कहिले न उतारी पनि आगो लगाइयो !पन्ध्र दिनसम्म लगातार यातायात बन्द हुनु मामुली कुरा भयो ! आफ्नो समेत सहमतिले बनेको र आफ्नो संबैधानिक रास्ट्र प्रमुखको  स्थान सुरक्षित रहेको संविधानलाई त्यसकै संरक्षकले घांटी रेटी रेटी मारेपछि स्थिति झन् गम्भीर भयो ! राजनीतिक दल पनि भड्किए !जसले गर्दा संघर्ष तिनकुने भयो !यसको निष्कर्ष कसरी निस्कने हो ,कसैले अड्कल काट्न सक्ने स्थिति रहेन !

समीरको जीवनमा अरु दुइ वटा महत्वपूर्ण घटना घटे -एउटा त उसको खुल्ला प्रतिस्पर्धाको परिक्षा बाट उप सचिव पदमा प्रमोसन भयो अनि उसको अर्को एउटा सन्तान पनि थपियो !यसपटक छोरोको रुपमा !इमान्दार ,लगनशील र मिलनसार स्वभावको भएको हुनाले उसका साथीहरु बढ्दै गए !यो उसको पहिले देखिकै गुण थियो !सम्पतीको किचलोमा नफसेको हुनाले घरपट्टि ममी र भाइ बहिनीहरुसंग पनि उसको राम्रो भलाकुशारी र आवत जावत थियो  !ससुराली पट्टि त त्यसै राम्रो छदै थियो !भाइहरु र ममिकै बिचमा बरु सम्पतिको लागि किचलो भैरहन्थ्यो ! उनीहरुले व्यापारमा पनि  त्यति उन्नति गरे जस्तो लाग्दैनथ्यो उसलाई !भर्खर सिक्दै छन् !उमेरमा पनि काँचै छन् !गर्लान,उ चित्त बुझाउथ्यो !